ما هو صوت العلامة التجارية!
ما هو صوت العلامة التجارية!
ممكن نعرف صوت العلامة التجارية علي أنه “الطريقة أو الأسلوب الذي يتحدث به البرند (الشركة) مع العملاء” أو ” هي نغمة المخاطبة بين العلامة التجارية – البرند – و الجمهور”.
يعني ممكن نقول الطريقة أو الأسلوب “نبرة الصوت” اللي العلامة التجارية أو البرند بيستخدمها لما يحب يتواصل مع العملاء أو الجمهور سواء لبيع منتج أو عرض خدمة أو توصيل رسالة أو غيرها. ونبرات الصوت دي بتختلف من وقت للتاني حسب البرسونا اللى هي شخصية العميل اللى بتكلمها الشركة وحسب المنتج اللى بتتكلم عنه وحسب الحدث أو الظروف المحيطة بالعلامة التجارية او البرند.
طب ما هي نبرة الصوت دي؟؟
نبرة الصوت هي انك ترفع صوتك لما تكون زعلان مثلا، أو تخفض صوتك لما تكون بتقول كلمة سر أو نبرة صوتك الغربية لما تكون لسه قايم من النوم أو الهدوء في صوتك لما مزاجك يكون رايق، وغيرهـ ..
وعشان الشركة تقدر تخلق صوت للعلامة التجارية خاص بيها ففي أربع ابعاد اساسية لصوت العلامة التجارية لأي برند، وهما:
1- حس الدعابة
2- الشكلية
3- الإحترام
4- الحماس
الأربع أبعاد دول الشركات مش بتختار واحد منهم يبقى هو ده هو تون الصوت ليها، لأ ده صوت العلامة التجارية بتاع الشركة بيكون خليط من الأربعة باختلاف النسب.
يعني لو حطيت درجة من 1 لـ 10 لكل بُعد من هذه الأبعاد الأربعة هتلاقي إن كل شركة بتختار نسبتها من كل واحدة بما يتماشى مع الشكل اللي الشركة عايزة تظهر بيه للجمهور بتاعها.. وده مثال توضيحي..
– فمثلا تخيل إنك تأخرت في نزول بوست معين على جمهورم، وجمهورك مستنيه، وعايز تنزل اعتذار، ودي هتكون الرسالة:
“نعتذر لتأخير المنشور (البوست) المحدد موعده مسبقاً، وسيتم نشره في وقت لاحق يوم السبت المقبل”
هنا انت “جاد”، و”رسمي”، وطريقتك “محترمة”، وبتقول “حقيقة”.
– طيب خلينا نقول نفس الكلام وبكن بطريقة تانية:
“آسفين جداً! عندنا مشكلة اتأخرنا عليكم في البوست، بس متخافوش هينزل السبت الجاي.. خليكوا مستعدين”
هنا انت مازلت “جاد” ولكن أقل من الرسالة الأولى، و”مش رسمي” خالص، ومازلت برضو بتتكلم بطريقة محترمة، بس بقى في حماس أكثر في أسلوبك.
ودي أهم الكلمات اللي ممكن تعبر عن نبرات الصوت:
1- موثوق – في ثقة في المحتوي المقدم
2- مُراعي
3- مبهج – سعادة
4- خشن – غير متساهل
5- متحفِّظ – في رسمية شديدة
6- تحادثي – فرندلي
7- عارض
8- جاف – غير متساهل
9- منفعل – كثير الانفعال
10- متحمس
11- رسمي – يعني طريقة الكلام رسمية
12- صريح – كونك واضح وصريح فيما تقدم
13- ودود – لطيف وفرندلي
14- مرح – كثير المتعة
15- مضحك – فاني، كثير الهزار
16- روح الدعابة
17- غني بالمعلومات – جدا مفيد
18- غير موقر أو جريء – طريقة غير لطيفة او غير مهذبه
19- حقيقة
20- حنين لشيء
21- عاطفي
22- مرح أو لعوب
23- محترف
24- استفزازي
25- ملتوي
26- محترم
27- رومانسي
28- ساخر
29- جدي
30- ذكي
كل كلمة من هذه الكلامات ُتعبر عن نبرة صوت مختلفة، وطبعاً نبرة صوتك بتتكون من خليط من الكلمات دي مع بعضها، ولكن خد بالك من الكلمات اللي متنفعش تبقى موجودة هي وعكسها مع بعض، ركز كويس في اختيار نبرتك الخاصة عشان دي اللي بتعبر عنك ودي اللي هتدي (تحدد) الانطباع للجمهور عن أسلوبك وشخصية الشركة بتاعتك.
وعشان تحدد الكلمات الخاصة بيك لازم َتمر أو تعدي بمرحلتين، هما التخطيط و التقييم..
مرحلة التخطيط: في الأول هتبقى محتاج تضع الخطوات العريضة لنبرة الصوت المناسبة ليك، ودي تقدر تحددها باستخدام الأبعاد الأربعة لنبرات الصوت واللي شرحناها فوق..
بعد ما تحدد انت عايز تبقى فين بنبرتك حسب الأبعاد الأربعة ابدأ حط الاستراتيجية الخاصة بنبرة صوتك عن طريق قائمتين واحدة هتحط فيها الكلمات اللي عايزها تكون نبرتك، والتانية هتكون الكلمات اللي مينفعش تعبر عنك.
مرحلة التقييم: وهنا انت هتحاول تشوف انت أد إيه واصل للنبرة اللي انت محددها، وده عن طريق اختيار عينات عشوائية من المحتوى بتاعك وبعد كده طلع الكلمات اللي بتعبر عن نبرة كل قطعة محتوى فيهم ..
خطوات تحديد صوت العلامة التجارية او نبرة الصوت لأي برند أو شركة :
1- تخيل إن البراند بتاعك عبارة عن شخص.
2- راجع المحتوى اللي نزلته قبل كده – في حال وجود محتوى قديم – وقسمه مجموعات بناء على الكلمات المعبرة عن كل مجموعة، مثال: عاطفي – ساخر – رسمي – كاجول.
3- اعمل قائمة بالكلمات الإيجابية اللي عايزها تعبر عن البراند بتاعك، مثال: ودود – عاطفي حماسي – محترم، وبعدين اعمل قائمة من الكلمات السلبية اللي عاوز تتجنب استخدامها في البراند بتاعك، مثال: ساخر – غير موقر – رسمي .
4- حدد مثلا من 3 لـ 5 كلمات إيجابية هتستخدمهم في البراند بتاعك و زيهم بردك من 3 لـ 5 كلمات سلبية هتتجنب استخدامه في البراند بتاعك.
5- نزل المحتوى بتاعك سواء كان مقروء أو مسموع – فيديو أو صورة أو مقال أو غيرهم وشوف انطباعات الجمهور كانت إيه ولو وصلت لإن نبرة الصوت اللي بتعبر عنها الكلمات دي متطابقة مع انطباعات الناس عن شركتك ومنتجاتك يبقى انت كده وصلت لهدفك وقدرت تخلق نبرة صوت تعبر عن البرند بتاعك.
وبكده هنكون وصلنا لنهاية المقال بتاعنا واللي اتكلمنا فيه عن صوت العلامة التجارية واللي اتمنا اني اكون وفقت فيه فإن كان هناك توفيق فمن الله وإن كان هناك خطأ فمني والشيطان.. واشوفكم في مقال جديد ان شاء الله.
لو عندك اي استفسار سيبة في كومنت وانا هرد عليك، شكرا..
